Joh 20 | TGG | STEP | Na biingbiing saksak, na tipes u e biing na wik, aunbiing i kumkubunor biitom, Maria Makdalin ka la una matanfat una luun minet. Ke ka par u le fat tinawii na matanfat ri ka tel ufu tah.

John 20

Iesu i Aptih Fis

(Mt 28:1�8; Mk 16:1�8; Lk 24:1�12)

1 Na biingbiing saksak, na tipes u e biing na wik, aunbiing i kumkubunor biitom, Maria Makdalin ka la una matanfat una luun minet. Ke ka par u le fat tinawii na matanfat ri ka tel ufu tah. 2 Ka filau fis usuf Saimon Pita ke kalalik na fafausum, ae Iesu i ier kanaka isi, ma ka fas ruh aragii, “Ri ka kep ufu ta Kumguui tina matanfat, ma biil keme usum le ri ka luun u mang fiawah!”

3 Ke Pita ru e kalalik na fafausum ae ru ka la una matanfat. 4 Ru turim ru filau, isau le kalalik na fafausum ae ka liu ufu Pita ke ka tapiek famu na matanfat. 5 Ka parau ke ka kongkilii, ma ka par foron rokap na kaen ae ri afit ta Iesu ini tinaiwa tom, isau le biil i kau. 6 Saimon Pita, ae i mih sau lo, ka tapiek ma ka kau sikit una palgan fat ae. Ke ka par foron rokap na kaen ae tinaiwa tom, 7 turan kaen sabin ae ri fis ta u kale paklu Iesu. Kaen ae, aragii ri palim ta u, ma ri ka luun keskes u tom koseng fal e kaen tinaiwa. 8 Namih, kalalik na fafausum ae i tapiek famu tah na matanfat, ka kau sabin. Ke ka par u ma ka unune. 9 Aunbiing ae, biil biitom ri malal na orek ae na Buk na Gogoh le, Iesu in aptih fis tina minet.

Maria Makdalin i Par Iesu

(Mt 28:9�10; Mk 16:9�11)

10 Ke, iun kalalik na fafausum ru ka fis una maleh. 11 Isau le Maria Makdalin i sotih awii na maleh na matanfat ma ka teng. Aunbiing i teng biitom, ka parau ma ka kongkilii. 12 Ke ka par iu e angelo ru kau ta na foron tier ae i pos tikii, ru kiis tah na falifuh ae ri luun ta pununfo Iesu lo, neng na koskosngoi kia, ke neng na kar keke.

13 Ru ka diik u aragii, “Tin ier, o tingis sanih?”

Maria ka kiliis ruh aragii, “Ri ka kep ufu ta Kumguui kiak, ma biil ia usum le ri ka luun u mang fiawah.” 14 Ka giliim fis ke ka par Iesu i sotih la aiwa, isau le biil i iliim u, le i e Iesu sau.

15 Iesu ka diik u aragii, “Tin ier, o tingis sanih? O im isi seh?”

Maria i wol le i e taman mok, pesu ka fas u le, “Ier, male o ka kep ufu tah, fas iau ini falifuh o luun u lo, isi iak kep pes u.”

16 Iesu ka tara sing i aragii, “Maria!”

Maria ka giliim usuf i ma ka tara aragii na orek Ibru, “Raboni!” Kamtinan orek ae, le tom fafausum.

17 Iesu ka tara sing i aragii, “Gong o pose lo iau, wara le biil biitom ia fis ubae usuf Tata. La usuf foron tuaklik ma ok fas ri le, ian fis ubae usuf Tata i e Tama gam, usuf God kiak i e God kimi.”

18 Maria Makdalin ka la usuf berberat na fafausum ke ka fas ri le, “Ia ka par ta Kumguui!” Ma ka fas ri le Iesu i fas ta u ini foron tier ae.

Iesu i Tapiek sing Foron Berberat na Fafausum kia

(Mt 28:16�20; Mk 16:14�18; Lk 24:36�49)

19 Na efef worwor, na tipesu e biing na wik ae, berberat na fafausum ri kiis turim ma ri ka babat rakrakai na foron matanfel, wara le ri soke foron famfamu ken fan Iudaia. Iesu ka tapiek ma ka sotih na fatpoto ri ma ka tara aragii, “Siaroh in kiis na balmi!” 20 Ka use ta u arae, ke ka finngas ri ini iun lima ke baba. Foron berberat na fafausum ri ka lala laes na aunbiing ri ka par Kumguui.

21 Ke Iesu ka tara sabin sing ri aragii, “Siaroh in kiis na balmi! Arae Tata i wuun ta iau ke ia sabin ia ka wuun gam.” 22 I use ta u arae, ke ka mangeh ulo ri, ma ka tara aragii, “Gam kep Tanwa Kalkaluu. 23 Male gamen wol ufu foron sinang laulau ken tikas ke God in pa ufu foron sinang laulau kia. Male biil gam wol ufu foron sinang laulau kia, ke God biil in pa ufu foron sinang laulau kia.”

Tomas i Par Iesu

24 Tomas (nenge asa sabin e Didimas, kamtina le Kasang), i e neng lon foron sangful ini u e kalalik na fafausum, i mangmangal aiwa tura ri, aunbiing Iesu i tapiek tah sing ri. 25 Ma fal e berberat na fafausum ri ka fas u le, “Kemem ka par ta Kumguui!”

Isau le Tomas ka tara sing ri aragii, “Male biil ia par salan nil na iun lima, ke iak fakau katngan limang na iun salan nil, ke iak fakau limang na baba, biil tom ian unune.”

26 Na ifit e biing namih, berberat na fafausum ri ka kiis turim sabin awii na palgan fel, Tomas sabin tinaiwa tura ri. Ri babat rakrakai na foron matan fel, isau le Iesu ka tapiek ma ka sotih na fatpoto ri, ke ka tarah, “Siaroh in kiis na balmi.” 27 Ke ka tara sing Tomas aragii, “Fakau katngan limam aga, par iun limang, sawe limam ke ok fakau u na babang. Gong iu e wolwol kiam, on unune sau.”

28 Tomas ka tara sing i aragii, “Kumguui kiak ke God kiak!”

29 Ke Iesu ka fas u aragii, “O unune sau, i wara le o par iau. Isau le, fanu ae biil ri par ta iau ma ri unune sau, rin kep fafakalok.”

30 Iesu i tel ta ifuun sabin e foron rakrakai na fakileng na matan berberat na fafausum kia ae biil ia siit papte ta u na buk igii. 31 Isau le ia ka siit papte foron tier igii, isi gamek unune le Iesu i e Mesaia ke i e Kalalik ke God. Male gamen unune lo, ke gamen kep liu na asa.